..الحمد لله..

مش عاملة التدوينة دى عشان ارغى زى كل مرة..
بس حابة انى اكتبها بردوا..
انا بحمد ربنا على انى متولدتش وعندى عيب خلقى، او اى مرض.. 
وبحمد ربنا على انى اتولدت ميسورة الحال، مش بشكى من الفقر، ولا غنية، اى انى فى الوسط والحمد لله.. :v 
وانى فى قسم ناس كتير نفسهم فيه، مع انى هافضل كارهاه حتى لو حصل ايه.. هو كده بقى =3= :v
وبحمد ربنا انى اوتاكو.. ^^ 
انتهى.. :v 
حياتى متساوية ما بين الحزن والسعادة..

رجعت تانى.. وناوية ارغى..استحملونى.. XDDD

زى ما قلتلكم انى هارجع بعد ظهور النتيجة، والحمد لله نجحت ومشلتش ولا مادة، ودا الاهم :v

المهم..حصلت حاجات كتيرة اوووى من اخر مرة كتبت فيها، زى مثلا روحت اشوف فيلم يابانى فى دار الابداع فى الاوبرا فى اول مارس، وكان يوم ممتع، لانه كان اول مرة اروح وارجع من الاوبرا لوحدى من غير اخواتى..

واليوم ده كان بالنسبة لى تأكيد لكل شكوكى.. وان فعلا فى انسانة جميلة اعرفها فى حياتى بس مش مديالها قيمتها فعلا، واحب اشكرها على انها معتبرانى صديقتها، ولانى انسانة مش بتحب تظهر احاسيسها، فهى اكيد مش هتعرف انى بكتب دا عنها ^^ ...

اريجاتو، اتاشى نو توموداتشى.. ^^

الفيلم بجد رائع وبنصحكم تشوفوه، هو ليه جزأين، شفت الجزء الاول منه فى الاوبرا وبفكر اشوف التانى على النت..

المهم اسم الفيلم هو Kamisama no Karute 

وبعدها بفترة قصيرة، حضرت يوم اليابان فى كليتى.. اليوم ده خرجت منه هادئة الاعصاب، معرفش كل ما احضر حاجة خاصة باليابان، برجع منه سعيدة وهادية، مش مهتمة فيه بمين معايا.. بس فعلا اليوم ده بقى احلى لما اقابلت اصحابى اللى من قسم اللغة اليابانية.. ربما انا مكنش فى بالهم او فى اهتمامهم، بس انا بحب رفقتهم، شخصياتهم مختلفة ومنعشة وتحبى انك تفضلى قاعدة معاهم اليوم كله ولا هتزهقى ابدا... ^^ 

واحدة منهم اكتشفت ان صوتها رااائع بجد *^* ..طلعت غنت فى الاغنية الجماعية اللى كانت فى اليوم ده.. 

وعشان مأخدتش اذنهم فى نشر الفيديو، فمش هنشره هنا، بس كان نفسى تشاركونى احساسى فى اللحظة دى، بس اعتقد ان كلامى قد يوصلكم الاحساس ده..

تصدقوا انى كنت مضايقة حاليا وانا بكتب الكلام ده، بس عشان افتكرت لحظات سعيدة فى حياتى، نستنى غضبى ده.. ^^

الحمد لله ^____^

بدأت اشوف مسلسل يابانى اسمه Massan

هو 150 حلقة، لكن الحلقة الواحدة اقل من 15 دقيقة.. وكمان قصته منعشة، وتعتبر قصة حقيقية، يعنى مش خيال..

لما الاقى وقت طويل، هابقى اكمله كله.. ^^ 

من الاجزاء السعيدة فى حياتى الايام دى، انى اشتريت كتافة للكمان بتاعى واخيرا ^0^ ..وكمان غيرت الوتر المقطوع فيه ^^ ..ورجعت اتمرن تانى.. الحمد لله، حاسة ان فى امل فيا ^^ ...

الجزء اللى زعلنى، وكالعادة هما اصدقائى... مش عارفة، احيانا بيجيلى احساس ان الحياة من غيرهم هتبقى احسن، بس بردوا مش بعرف استغنى عن الشعور ده، كأنه مرض، بس بجد هاحاول انى مخليش الموضوع ده هو محور حياتى، والا هاموت بسببه..

واللى كان ومازال مزعلنى هو ان الانمى اللى كنت بشوفه من موسم الخريف Shigatsu wa Kimi no Uso خلص خلاص!!

وياريت النهاية سعيدة، لكن للاسف انتهت بموت البطلة "Kaori" ب_ب ...

انا كنت عارفة النهاية دى من الSpoilers اللى كانت مغرقة الفيس =0= !!

بس بردوا فى احداث فى الحلقة الاخيرة مكنتش عارفاها او متوقعاها 0__0

"Spring will be here soon. Spring, the season I met you, is coming. A spring without you...is coming.."

"ありがとう"

وزى ما قالت واحدة من على موقع Myanimelist 

"My Thursdays won't be the same after finishing this anime. Shigatsu has taken me to a world of music that I will never forget.." 

لان فعلا حياتى هتختلف من بعد ما خلص... 

اعتقد ان ده نهاية كلامى.. 

TT^TT

المرة دى كلامى هيبقى قليل، ودا بسبب مللى واحباطى من الترم التانى من السنة دى فى الكلية ><
ليه احضّر مادة، اذا ليها بروفيسور ممكن يشرحهالى؟!!!
نفسى افهم، طيب ماشى احضّر، لكن دا مش معناه ان البروفيسور ميشرحش!! او انه يشرح بطريقة مش مفهومة =3=
كده حرااااااااااااااااااااااااااام!!
انا مش روبوت، تقولى امر انفذه بالظبط!!
انا تعبت من الاسلوب ده TT^TT
ومش عارفة اذا كنت عديت الترم الاول بسلام ولا لأ TT^TT
بس متبشرة بالخير ان شاء الله، لانى تعبت فى اول ترم..
مش هاكتب حاجة تانية، التدوينة الجاية هتكون بعد ظهور نتيجتى...

**ملحوظة**
قلت كلامى مش هيبقى كتير، لكن الحلقة ال18 من Nanatsu no Taizai كانت رهيبة بجد 0___0 !!
يعنى تعابير وجهى فضلت تتغير فى كل مشهد تقريبا... حبيت اتكلم عن الحلقة الصراحة، مقدرتش امسك نفسى من شدة ذهولى بروعتها *^* !!
 ودى صور ليها.. محدش يشوف الصور اذا مش عايز يتحرق عليه..
ادينى حذرت اهو.. :v 

 

الدراسة مرة أخرى..

    مش قادرة اصدق ان الدراسة خلاص يوم 7 فبراير 
    يعنى خلاص، انى اشوف الانمى بانتظام هينتهى قريب جدااا...

 وهارجع للمنهج الغير مفهوم، وللوقت القليل فى فهمه
واللى بيعنيه ان الامتحانات هتكون قربت وانا لسه مخلصتش المنهج..

عامة، انا مش هاروح اول يوم الكلية، لانى رايحة حاجة اهم XDDD
الايجى كون *ن* ...
اى عالم الاوتاكو، انا مش رايحة غير لاسباب معينة وهى، هاشترى حاجات خاصة بالانيمى..

وكوسبلايرز من اليابان هيجوا يعمل عرض كوسبلاى ..

والاخير والاهم بالنسبة لى انا، هو انهم هيعرضوا رسمة ليا فى ركن رسم الفانز.. دا اللى مفرحنى اووى معرفش ليه.. :v 

بس بعد اليوم الجميل ده، هارجع للدراسة بردوا TT^TT 

سأشتاق إليكِ يا عزيزتى *الاجازة* :v 

هاقابلك قريب ان شاء الله :v

حتى يحين هذا الوقت، سايوووناراا!!

اول تدوينة لعام 2015

اكتب عن ايه :v مش عارفة الصراحة XDDD 
و بما انى قررت انى لازم اكتب حاجة النهاردة، يبقى هاكتب!! *0*
امممم، اكتب عن ايه بقى؟!!! :v 

حسنا حسنا~ :v
هاكتب عن الانيمات اللى شفتها والخاصة بالموسم اللى احنا فيه، اى موسم الشتاء..

وباين الموضوع هيطول    
اذا..
فلنبدأ..
اول انمى هاتكلم عنه هو Binan Koukou Chikyuu Bouei-bu Love!

اى حد شاف صور ليه، او شاف الtrailer بتاع، هيقول عليه انه انمى سخيف، او مقرف، عشان فكرة الماهو شونين دى..
وانا كنت من الناس اللى قاله كده وضحكت كمان صراحة، لكن بعد ما شفت اول حلقة، فكرتى اختلفت فعلا..
يعنى هو اه فكرته طفولية شوية، وهى انه فى ابطال بيهزموا الشر كل حلقة بقوة الحب..
لكن القصة ممتع بالرغم من ذلك..
وكمان حكاية الراجل الميت اللى بيقعد معاهم ده بيضحكنى اوووى XDDD
وطبعا مينفعش اعطيه حكم من قبل ما اخلصه تماما، هو اتعرض منه حتى الان 4 حلقات بس... 
بس حتى الان، الموسيقى شايفاها ممتعة، ومش بمل من سماعها ابدا، واول ما هتنزل هاحملها اكيد..
اما الرسم، ما هو اكيد مش ممتاز 100%، بس جيد ومش وحش، يعنى صراحة رسم الشخصيات فيه جميل ^^ ..
وكمان جو الالوان دى كاوايى كده، يمكن عشان فكرته هى الخير، فلازم يبقى ملون كده :v ..فكرة مش بطالة بردوا..
طبعا الحلقة الرابعة كان فيها مشهد ليهم وهما فى الحمام العام، فيعنى اللى قرر يشوفه، يخلى باله من المشاهد دى..
اقول ايه تانى عنه، مفيش حاجة فى عقلى ممكن تتقال عنه تانى.. يووووش، فلننتقل للانمى الاخر..

تانى انمى هاتكلم عنه هو يعتبر من الانيمات القريبة الى قلبى، ودا لانى شفت اول جزء منه وقدر يأثرنى الصراحة
هو Aldnoah.Zero 2nd Season

يعنى من كتر ما هو رائع، كلامى عنه مش هيخلص، ومعرفش نهاية الجزء التانى هتبقى عاملة ازاى، لان بكل بساطة، الانمى ده مش هتقدر تتوقع له نهاية ااابدا.. لما شفت الجزء الاول، توقعت نهاية ليه، لكن لما شفت الحلقة الاخيرة، اندهشت جدا، وكان توقعى بكل بساطة، خاطىء..
اللى كان خلانى اشوف الانمى ده هى فرقة غناء يابانية اسمها Kalafina ..وهى تعتبر فرقتى المفضلة، وكانوا عملوا اغنية الOP الخاصة باول جزء، وهو دا السبب اللى خلانى اشوفه..
بس طبعا من اول حلقة، القصة كمان هى اللى جذبتنى...يعنى بيتكلم عن حرب ما بين المريخ والارض، بس طبعا مش عشان قلت كده، دا معناه انه هيبقى كله حرب، ولكن العكس، دا شامل من كله، من حرب وانتقام ومشاعر كتيرة فى انمى واحد *^* 
قصة معمولة بحبكة عبقرية، من حيث التخطيط ومن كل شىء، يعنى البطل اللى هو ايناهو ذكى جدا بطريقة غريبة، تخليك تتنرفز كده :v 
الموسيقى، مفيش كلام اساسا 10 من 10 *0* ...دى جباااارة، اذا كان اللى عامل الOST هو نفسه اللى عمل OST انمى Shingeki no Kyojin

ام الرسم، فلا غبار عليه، بجد متقن الى ابعد الحدود، يمكن باهول فعلا XDD بس انا شايفاه كده الصراحة *^*
لانه انمى ميكا، فاكيد لازم يكون متقن، عشان الالات الحربية وكده، بس بجد رائعة *^* ...

ندخل على الانمى التالت اللى بشوفه من الموسم ده..
وهو Ansatsu Kyoushitsu

انمى كوميدى واكشن فى نفس الوقت، ودا يعتبر من الانيمات اللى بتخليك مستمتع بوقتك كده وانت بتشوفه..
بيتكلم عن فضائى شبه الاخطبوط كده، دمر القمر وخلى شكله هلال للابد، وهدد بتدمير الارض اذا مخلهوش مدرس لفصل معين والفصل ده لازم يجربوا انهم يقتلوه..
وانا لما شفت الtrailer فكرته هيبقى اكشن بقى ورعب XDDD
بس العكس، كورو-سينسى، شخص كاوايى اوووى، وعطوف اتجاه طلابه اللى المفروض يقتلوه XDDDDD
بجد قصة ممتعة، واتمنى انه فى النهاية ميمتش!!

الموسيقى جميلة، بس لسه مأثرتنيش اوووى...

اما الرسم، فبجد جميل، وكل ما افتكر ان بطل القصة "ناجيسا" ولد، بندهش.. :v !!

هادخل على رابع انمى، اللى هو Saenai Heroine no Sodatekata

مكنتش هاشوفه :v ..مش عشان حاجة، بس قلت ان القايمة اللى بشوفها حاليا طويلة اوووى، يعنى فوق ال10 انيمات اللى بشوفهم..

بس اول ما صاحبتى قالتلى على انه انمى للمانجا اللى انا بقرأها، من غير كلام تانى، روحت على طول شغلت اول حلقة وبدأت اشوفه من ساعتها، المانجا بتاعه رسمها متقن الى ابعد الحدود، وكمان الشخصيات فيها كاوايى جدا ^^ ...

والرسم، حاسة ان رسم المانجا احلى من رسم الانمى..

وكمان ان الابطال اوتاكو  دا فرحنى اووى اووووى ^0^ 

لسه مركزتش اوووى مع الموسيقى..

خامس انمى هاتكلم عنه، هو..

Tokyo Ghoul √A

يعنى اكييييييد كلكم عرفتوا انا هاتكلم عن ايه، عن الجزء التانى من طوكيو جول...

الانمى المميز فى قصته، كل اللى شافوه اضايقوا عشان مش زى قصة المانجا وعشان مفيهوش اكشن كتير..

انا بقى عكسهم، شايفة ان القصة جيدة جدا، والانمى نفسى اكتر من انه اكشن، يعنى تخيلوا لو القصة حقيقية، وفى كانيكى حقيقى

هتعتقدوا ان القصة كانت هتبقى اكشن فى الواقع، اكيد لأ، كانيكى كان بيعيش الواقع اللى بقى فيه، ومش قادر عليه، اما فى الجزء التانى..

كانيكى اتغير كليا، بس مازال فى جزء منه مش ظاهر، ليه راح مع الجماعة دى، وليه مضايق!!!

الموسيقى روووعة، المشكلة اللى ضايقتنى هى اغنية الOP، مكنتش حلوة زى بتاعت اول جزء، بل مملة جدا، مدخلتش مخى..

اكيد فى ناس عجبتهم، بس معجبتنيش انا...

الرسم بقى احسن واحلى، بس طبعا فى مشاهد مكنش الرسم فيها قووى جدا، لكن مشاهد كانيكى، بيبقى الرسم فيها عالى جدا..

سادس واخر انمى بشوفه من انيمات موسم الشتاء هو..

Death Parade

حسنا، القصة دى غريبة اووووى، يعنى ايه ناس يموتوا ويروحوا مكان يلعبوا لعبة عشان يتحدد ما اذا كان هيرجعوا فى جسم جديد، ولا يروحوا عالم الظلام!!!

طبعا انا مش بحب اتعمق فى القصص اللى فى النوع ده من الجانب الدينى..

بس الاثارة والغموض فى القصة هو اللى شدنى ليها جدا...

طبعا لسه مظهرش كل شخصيات الانمى، بس من اول حلقات وكل شخصية ظهرت فيه ظهرت وبقوة..

الموسيقى الخاصة بالانمى جميلة، وعجبتنى زى  ما عجبتنى كل موسيقات الانيمات اللى فاتت..

الرسم هنا مجتهدين فيه، ودا طبعا ملحوظ...

....

كان نفسى اتعمق فى كلامى اكتر، بس انا مش من النوع اللى بيستحمل الكتابة الكتيرة، فحاولت الخص بقدر الامكان :v 

واخييييييييرا وصلت للنهاية، اتمنى ان يكون حد قرأ الكلام ده كله، عشان مكنش كتبته على الفاضى =3= 

دا شكلى دلوقتى وانا بكتب والله XDDDD

الساعة قربت على 11 بالليل، والمفروض هاروح بكرة معرض الكتاب وعايزة اناااااام

Quiero dormir muchooooo

لهذا، اراكم قريبا، فى تدوينة بعيدة XDDDD

~おやすみ~

!Keep Moving Forward

طول ما احنا عايشين، يبقى لازم نسعى ورا حلمنا، احنا مش موجودين فى الحياة دى بس عشان ناكل ونتفرج على انمى، او عشان نخرج مع اصحابنا وبس، احنا موجودين عشان اسباب اسمى من كده بكتييير...
بالنسبة لى، وجودى فى الحياة معناه انى اثبت نفسى للمجتمع، وان احلامى مش مجرد خيالات من عقلى الباطن، بل واقع وقريب جدا هيتحقق، وكمان مش للمجتمع بس، بل ليا انا ايضا...
يمكن حاليا انا كائن كسول ومش بيفكر غير فى الاكل والانمى فعلا، لكن كل ما بفكر فى احلامى، دا بيخلينى اشتغل على نفسى اكتر..
واى حد بيقرأ كلامى ده دلوقتى، اتمنى انه يساعده فى تحقيق حلمه...
احلامى يمكن تكون بعيدة عنى لانى لسه ممسكتش فى الخيط بتاعها، لكن اول ما اوصل للخيط ده، هامسك فى حلمى لغاية ما اوصل لنهاية الخيط، ونهاية الخيط معناه تحقيقى لحملى..
حلمى محتاج انى اكد واعمل واسعى ورا كل كلمة وكل وعد وعدته لنفسى، ووعدته لناس تانية اعرفها...
نفسى بجد انى احقق كل احلامى!!
______

فى فيلم كل ما بشوفه بيفكرنى بالكلام ده، واعتقد عنوان التدوينة دى لمح لكم على انى فيلم بتكلم عنه.. ^^
اجل، فيلم Meet the Robinsons

الفيلم ده عبارة عن اداة تحفيز بالنسبة لناس كتير غيرى وليا كمان، اتمنى اللى مشفهوش يبقى يشوفه، لانه يستحق وقتك..

اسعوا ورا حلمكم رجاءا، انا متطلعة لكل احلامكم المستقبلية العظيمة.... ^^
كل العظماء بدأوا بحلم بسيط...

*الاغنية دى كل ما اسمعها بحس بأمل وتفاءل، اسمعوها*

!!~College, Bakaaa

يلاااا!!، انا مش انسان طبيعى.. :v

نفسى، نفسى ولو مرة واحدة، اكون فى نفس قوة الدراسة دى...

مش عارفة ليه دايما اقول كلمة، وتحصل حاجة مختلفة لتوقعاتى...

ليه مخى الكاوايى مش بينفذ اوامرى اللى بتنيل اطلبها منه؟!!!!!!!!

انى اكرهك أيتها الدراسة الحمقاء، البغيضة...

مش عارفة ليه متبقيش ممتعة ومسلية... ليه لازم تكونى شريرة، وغريبة وصعبة ومملة، وكئيبة وبتخلينى اعيط دايما قبل كل امتحان..

ليه لازم ابقى خايفة وانا رايحة امتحن؟!!!

ليه مبقاش رايحة وانا مش خايفة من كلمة امتحان ذات نفسها؟! 

ليه مافيش مادة خاصة بالانمى *عاشت فى الجو شوية، معلش يا جماعة* 

امتى اخلص بقى، واروح اشتغل فى كنتاكى :v *اى شغلانة شريفة* :v :v